متغرقش ابدا شخص واحد بالحب .. القلوب بتتعب لما بتحتاج ومبتلاقيش اللي بتحبه موجود ..

كورة جول
الصفحة الرئيسية
بقلم :مها ضاحي 


متدخلش في حياة حد تحسسه أنك سنده ودعمه .. تتواجد بشكل عالي يخليه يفقد اتزانه وبعدين ترجع تقول انا موعدتش بشىء .. 

تصرفك وعد .. وجودك بيربي احتياج .. العلاقة بتتبني بسبب المواقف اللي بتم بينكم .. فكل موقف ليك بيقول شىء عن احساسك بيه .. 

واسوأ شىء ممكن تعمله أنك تحتضن وجع حد .. انك تخليه يعتمد عليك نفسيا .. ويبقى مش قادر من كتر ما لقى معاك الإحتواء والحب وقت الضغوط .. ووقت احتياجه الشديد وتعطشه للحب .. انك تزرع نفسك ف روحه .. وتعطله عن قدراته في شفاء نفسه بنفسه .. 

لأنك ممكن متقدرش تكمل نفس الدور .. 
لأنك ممكن تبقى مش موجود بعد لحظة .. 

حرام القلوب اللي بتتعشم دي بسبب ان قلبك جميل وبيستوعب وبيحتوي .. 

اقف جنب اللي موجوع بس بالقدر اللي يسنده مش يضعفه .. متضعفوش حد بتغريقهم بالحب .. غرق الحب بيسبب تعلق .. بيسبب ادمان وعطلة ف الحياة 

ادوا الحب بميزان .. فرملوا الدلدقة شوية .. عمرها ما بتتحسب بكتر سد الثقوب للآخر .. لازم يبقى في مخك ان القلوب مواثيق .. لو انا قررت افضل موجود .. بتفضل دايما للآخر .. موجود وبنفس الشكل .. 

بس الحياة مبتسمحش .. المسؤوليات بتضغط .. وبتبعد الناس عن بعد .. عشان كده .. وانت بتلاقي قلبك بيجرفك عشان تحسس غيرك بأمان صبح وليل ف كل لحظة فكر انك ممكن تكون في اللحظة بتسنده .. لكن مع الوقت بتضيعه لما يبقى محتاجك وانت عنه مشغول .. 

عشان كده م الأول .. اتواجد وغيب .. ادي وخد .. ادعم لما تقدر .. وخلي الحياة ترتب ان في اوقات ممكن متقدرش بسبب الظروف .. بلاش ادرينالين البدايات اللي بتخليك تيجي ع كل شىء عشان الحب ف بريقه لسه .. فبتدي كتيير وبعدين الطرف التاني يبقى بيتنشق ع لحظة من لحظاتكم الاولى ومش لاقيها .. 

التوازن حل لكل الوجع في العلاقات .. التوازن بيساعد اللي بيحب بزيادة واللي بيتعلق بزيادة انه يحط حبه في الحيز السليم .. من غير ما يأذي ولا يتأذي 

لما تلاقي حب جارف جوا قلبك لإنسان واحد .. اديه بقدر يدعمه وبعدين انشغل ووزع طاقة حبك على ناس تانية ... 

متغرقش ابدا شخص واحد بالحب .. القلوب بتتعب لما بتحتاج ومبتلاقيش اللي بتحبه موجود .. احترام المسافات .. اصلح دايما للقلوب .. عشان نعيشها صح من غير ذل واحتياج .. ومن غير تعطش لدوام الوجود .. 
 Maha Dahey


google-playkhamsatmostaqltradent